Lirtheia chetsualnaah mi pahnih an thi

July 28, Thawhlehni zan dar 7:30 vel khan Thingkah leh Lawngtlai inkar, Thingkah dáiah Maruti Suzuki Alto car MZ-02 A-3377 chesualin, kawng thlangah a lum a; mi pahnih - police Hav. R Lalremruata (52) s/o Baby Rosiamliani leh Laldinpari (56) w/o SI Lalhmuliana, Armed Veng South ve vete a hmunah an thi.

Thu dawn danin, Hav. R Lalremruata hi 3rd IR Battalion-a awm niin, 3rd IR Bn hmunpui Thingkahah a awm a, Laldinpari pawh a pasal hna thawhna hmun a nih avangin Thingkahah tho a awm. July 28 khan 3rd IR driver Roluahpuia (40), CTI Sesawng chu a tlai mu an kai tho zo lo a, a marphu an hmuh mai loh avangin Lawngtlai District Hospital panpui a ni a, a thi zui a ni.

Roluahpuia buaipui turin R Lalremruata, Laldinpari leh 3r IR mi leh sa tho Lalchhawnsanga te chuan zan dar 7 pelhah car-in Lawngtlai District Hospital an pan a, Thingkah daiah chesualin, kawng thlangah an tlan liam a ni. Chetsualna hmunah R Lalremruata leh Laldinpari an thi a, car khalhtu Lalchhawnsanga, Lunglei Luangmual na takin a hliam a, Lawngtlai Civil Hospital-ah dah a ni.

Chhiatna thlengah hian Thingkah leh Lawngtlai mi eng emaw zat chu ruang leh hliam la chhuak turin an thawk chhuak a, Lawngtlai Bawrhsapin tlawmngaia thawk chhuakte mamawha hman atan Rs 20,000 a pe. Lawngtlai district thuneitu te, police hotute leh Central YLA hruaitute'n chetsualna hmun an ṭhutchilh bawk.

R Lalremruata leh Laldinpari te ruang hi endik (postmortem) a ni a, tih tur ṭulte tih a nih hnuah nimin chawhnu dar 2 vel khan Aizawl panpui a ni. Laldinpari hi vawiin chawhma dar 11-ah vui a ni dawn a, R Lalremruata hi chhun dar 12-ah vui a ni ang.