KHAWTHLIR

ṬKP jubilee

Vawiin July 30 hi Mizoram Baptist Kohhrana ṭhalai pawl, Ṭhalai Kristian Pawl din champha vawi 75-na, platinum jubilee a ni a, ṬKP unit hrang hrangte an remchan angin an lawm dawn. Thupui chu, 'I ram lo thleng rawh se' tih a ni.

Tuihna sawiho

Serchhip DC Paul L Khuma hoin nimin khan 'Jal Sanchay Jan Bhagidari: Catch the Rain 2026' (JSJB: CTR 2026)' kalpui dan tur sawiho a ni. Hlawhtling taka JSJB kalpui a nih theih nan tuihna kang chat mai theihna hmunte zirchian a, action plan mumal tak siam an rel a; mimal, pawl, sorkar office leh zirna-in tinte'n ruahtui khawl nachang an hriat theih nan chak zawka hmalak an rel bawk.

Project hawng

Siaha District Hub for Empowerment of Women bultumin nimin khan Siaha CDPO Hepaw Hlychho chuan 'Project Thaichhawninu' a tlangzarh. Project Thaichhawninu hi Mizoram district tina RD Block 27-a khaw hrang hrangah kalpui tur a ni a; hmeichhe naupangte chu Post Office leh SBI-ah account hawnsak theih an ni.

VC tan training

Saitual district Panchayat Resource Center chuan nimin khan an auditorium-ah village council member-te tan ni thum awh tur training an buatsaih a, district local administration officer V Laldinsanga’n a hmanpui.

Census training

Mamit DC Suvigya S Chandra hoin nimin khan DC conference hall-ah Census 2027 thawh hnihna kalpui tura inbuatsaih nan field functionaries training neih a ni. Chhiarpui neih mekah data dik leh felfai tak neih a nih theih nan theihtawp chhuah tur leh, mithiam zawkte aṭanga zirtirnate uluk taka zir chiang turin kalkhawmte chah an ni.

Anti-Drug Club sikul 65-ah din

Saitualah District Narco Coordination Committee chu district bawrhsap Srinivas Sadi kaihhruaiin nimin khan an ṭhukhawm. Bawrhsap chuan, Police, Health leh Education departmemnt bakah, DCPO, NGO leh kohhran hruaitute ṭanghoa ruihhlo ṭhat lohzia inzirtirna tam zawk buatsaih a ṭul thu a sawi. Saitual district-a sikul 65-ah Anti-Drug Club din tawh a nih thu tarlan a ni.