Minister-in nihawi chi sem tur vailiam

Agriculture & Farmers’ Welfare minister PC Vanlalruata chuan nimin khan Agriculture Directorate conference hall-ah district 10-a nihawi chi sem tur a vailiam. Minister chuan, nihawi chu NAFED-in kg khat Rs 83.43-in an lei vek dawn thu a sawi.

PC Vanlalruata chuan, National Mission on Edible Oils (NMEO) hnuaiah Mizoramin hma a sawn a beisei thu a sawi a, "Central sorkar hmalakna hi Mizoram pawhin hmasawnna atan a hmang zel a, Mizoram Agricultural Marketing Board kaihhruaina hnuaiah National Agricultural Cooperative Marketing Federation of India (NAFED) chuan nihawi chite hi direct-in kg khat Rs 83.43-in a lei vek dawn a ni," a ti.

India ramah tél ei chi (edible oil) mamawhna a san thu sawiin Minister chuan, "Kum 2024 chhung ringawt khan metric ton maktaduai 25 aia tam mamawh a nih laiin, India ramin metric ton maktaduai 12.1 chauh a thar a, ram pum mamawh 40% bak a phuhru lo. Mizoram sorkar pawhin central sorkar hmalakna NMEO scheme hmang ṭangkaiin, loneitute intodelh zelna turin hma a la mek zel," a ti. Loneitute chu an sum lak luh a pun lehzual theih nan sawhthing bakah nihawi chín uar turin a chah a ni.