July thla chhungin sorkar pisaah Bawlhhlawh báwm chi 4 hûn tur

Champhai Town Sanitation Task Force Committee chu nimin khan district bawrhsap Mohammad Aaquib kaihhruaiin an ṭhukhawm. Bawrhsap chuan, sorkar pisa tinah July 31, 2026 hmain Solid Waste Manage-ment Rules, 2026-in a phût angin bawlhhlawh báwm chi li hûn ngei tur a nih thu a sawi.

Mohammad Aaquib chuan, fainaah Champhaiin hma a sawn zel thu a sawi a, "Mizoram district hrang hrangah kum 2024 khan fainaah pasarihna kan nih laiin, kuminah chuan palina kan ni tawh a, hmasawn zel turin chhungkaw tin kan ṭanrual a ngai. Sorkar department hrang hrangah July 31, 2026 hmain Solid Waste Management Rules, 2026-in a phût angin bawlhhlawh báwm pali hûn ngei tur a ni a, bawlhhlawh thliar hran dan tur ang thlapa thliar hran tur niin, uluk takin kan vil zui dawn," a ti.

Ṭhutkhawmah hian Champhai Solid Waste Management Centre hman dan tur leh Champhai district-a Solid Waste Manage-ment Rules, 2026 leh Plastic Waste Manage-ment Rules, 2016 hman dan tur sawiho a ni.