Roll Observer hoin SIR 2026 thlirho

Electoral roll observer K Lalthawmmawia hoin nimin khan Siaha DRRC Hall-ah Electoral Roll Special Intensive Revision (SIR) 2026 kalpui dan thlir let a ni a; Electoin official te, political party aiawh te, booth level officer te, booth level assistant-te bakah, Mara Thyutlia Py (MTP) leh Mara Students Organisation (MSO) aiawhte an tel.

K Lalthawmmawia chuan, democracy ramah electoral roll thianghlim leh felfai neih a pawimawh thu a sawi a, "Election Commission of India (ECI) pawhin a ngai pawimawh a, e-roll a thianghlim a, a hrisel theih nan kum tin summary revision leh kum tluanin continuous updation neih ṭhin a ni a, kum 20 danah e-roll pumpui siamṭhatna SIR neih ṭhin a ni," a ti.

India khua leh tui dik tak, kum 18 tling tawhte hmaih loa electoral roll-a thun a, paih ngaite paih chu ECI thupui a nih thu sawiin Observer chuan, "Tuna hearing neih mekah draft roll-a discrepancy lutte dik leh felfai taka thenfai a nih theih nan NGO leh political party-te an pawimawh a, mahni party bil hamṭhatna ngaituah hun a ni lo," a ti a; dik lo taka roll-a luh tumte veng a, lut tur dik takte an luh theih nan theihtawp chhuah turin a chah.