KHAWTHLIR

Thisen pe

Zirtiri Residential Science College NSS chuan nimin khan an college-ah thisen pek huaihawtin, Synod Hospital tan thisen unit 75 an pe a, petute mipa 58 leh hmeichhia 17 an ni.

MUHCS zawm

Care Hospital, Dawrpui leh Mizoram State Health Care Society chuan nimin khan inremna an ziak a, Care Hospital hian Mizoram Universal Health Care Scheme (MUHCS) an zawm thar. Heti hian Mizoram chhunga private leh kohhran enkawl damdawi-in 19-te'n MUHCS an zawm ta a ni.

Poppy leh kuhva AR-te'n an man

Assam Rifles sipaite chuan July 29, Nilaini khan Vairengtea kudam pahnih an dap a, poppy seed ip 275 (kg 14,575) leh kuhva rah ip 389 (kg 14,004) hmu chhuakin an man. Poppy seed an man hi cheng nuai 219 vel hù leh kuhva rah an man hi cheng nuai 191 vel hùa chhût a ni a; Directorate of Revenue Intelligence, Silchar hnenah an hlan chhâwng a ni.

Cheng nuai 416 hû ruihhlo man

Khawzawl District Narco Coordination Centre (NCORD) Committee chu nimin khan additional DC K Zorammuana kaihhruaiin an ṭhukhawm. Tun thla (July) kal mekah Khawzawl police-te'n heroin leh methamphetamine cheng nuai 416 hû leh ruihhlo kaihhnawihah mi pariat an man a, thubuai paruk an ziak lut tih tarlan a ni.

Plantation Drive

July 29, Nilaini khan Darlak khuaah Oil Palm Mega Plantation Drive huaihawt a ni a, Mamit bawrhsap Suvigya S Chaudhary-a'n hmanpuiin, oil palm ṭiak a vailiam. Drive-ah hian oil palm hmun nei leh self help group member 100 an tel a, thil pawimawh inzirtir a nih bakah, oil palm hmun enkawl ṭha mi pathum leh thar tam mi paruk hnenah lawmman pek a ni. Mamit district-ah oil palm ching mi 717 awm mek.