Beidawng duh lote an dingchang ṭhin - B Lalchhanzova

MZP Gen. Hqrs chuan nimin khan Aizawla IPR Auditorium-ah zirlai hlawhtlinna changte lawmpuina hun an buatsaih a; khuallian B Lalchhanzova, minister of state chuan, beidawng duh ngai lote an dingchan ṭhin thu a sawi.

B Lalchhanzova chuan, zirlaite chu an hma lam huna an thil tumte chu khirh deuh pawh ni se, tlawm mai loa kal zel turin a fuih a, "Hun khirhte chu ral leh mai tur a ni tih hre chunga beidawng ve duh ngai lote chu an dingchang tho tho ṭhin tih hriat reng tur a ni," a ti.

Ṭobul, hnam nunphung leh chìn dan te ngaihlu fo tura zirlaite chahin Minister chuan, "Chumi atan chuan mahni zâwn ṭheuhah inbih chiang ṭhin ang u," a ti a; chawimawina leh lawmpuina thilpek dawngtute chu an kal zelna turah duhsakna a hlan.

B Lalchhanzova chuan, mahni zâwn ṭheuha hma sawn zel turin mahni inhriat chian a pawimawh thu a sawi a, "Inelna sang tawh tak khawvelah dam khawchhuak tur chuan a nuam chin chauh piah lama kal ngam te, nghenchhan neih loh ngamte hi hlawhtlinna kawng a ni," a ti.

MZP president C Lalremruata pawhin thu sawiin, Mizoram chhung leh pawnah pawh ni se, harsatna Mizote'n an neih chuan nasa taka hma an lak ṭhin thu a sawi a; an thil ṭhatte hre duh lo a, an thil tih dik loh pakhat vanga sawiselna tam tak awm ṭhin chu ṭha an tih loh thu a sawi bawk.

Ram leh hnamin chhan a ngaihna apiangin Zoram mipuiin MZP an lam chhuah ṭhin thu sawiin MZP President chuan, "Ramri buaiah leh technical thil hrang hranga zirlaite’n harsatna an tawhin MZP a che chhuak ṭhin. Kum 90 zet MZP-in ram leh hnam zirlaite tana ke a pênna kawngah tih dik tâwk loh leh tih fuh loh pawh a nei tawh ngei ang," a ti a; MZP-in ram tana thil ṭha tam tak a lo tih tawhte hre turin zirlaite a chah.

Inkhawmah hian tun hnaia Mizoram University-in exam result a tihchhuaha under graduate-a gold medalist-te leh college hrang hranga student union hruaitu, rank holder-te leh hnam pual zirlai pawl hruaitute lawmpuina hlan a ni a; gold medalist mi pali, SU leader zinga rank holder panga leh university leh college zirlai hruaitu hlawhtlinna chang mi 64 hnenah hlan a ni.