Mualṭhuam North-ah natna a lêng; Mithiamte'n khua kal chilhin an enfiah

Lunglei district-a Mualṭhuam North khuaah tunlai hian khawsik áwm ná bakah, lu ná, luak leh pum ná a lêng a; hei vang hian July 29, Nilaini khan Health department leh PHE department chuan an tui tlan leh damlote dinhmun an endik a, sample ṭhenkhat chu ZMCH-a endik turin an thawn.

Public Health Engineering department, Lunglei WATSAN Circle-a Water Testing Laboratory-a mite chuan July 29 khan Mualṭhuam North mipuite tui tlan hnâr a thianghlim leh thianghlim loh an endik a; Health & Family Welfare department lamin damlote dinhmun an endik bawk. Endik lai hian chhungkaw puma khawsik leh áwm ná nei kawp 67.6% an awm a ni.

Health department-a thawktute chuan damlo 99 enin, hei hi khuaa mi cheng zat 1,570 aṭangin 6.3% a ni a; kum 2-63 inkarte niin, chung zinga 47.1% chu hmeichhia an ni. Damlo zingah sikul kal lai an tam ber a, sikul leh inkhawmna aṭanga hri kai an nia hriat a ni.

Tun hnaia damlo lan chhuahna hmasa an chhinchhiah chu July 15, 2026 a ni a; damlote insawiselna ber chu - khawsik, lu ná, luak leh pum ná te a ni tlangpui a, damdawi-ina dah luh ngai an la awm lo. An tui tlan chu vantlang tui lâk leh ruahtui a ni a; tui chhuan so chauh in ṭhin 29.4% an awm.

Damlo endik zinga 50% chu khawsikpui (typhoid) an kai leh kai loh en a ni a, 67.6% chu rannung seh (scrub typhus) an kai leh kai loh en a ni. An natna bul ber endik turin sample ṭhenkhat chu Zoram Medical College & Hospital-ah RTPCR hmanga endik turin thawn nghal a ni.