MYC Chairman leh Union Minister inkâwm

Mizoram Youth Commission (MYC) chairman Malsawmzuala Ralte chuan nimin khan Union Port, Shipping & Waterway minister Sabananda Sonowal chu Delhi-a a chenna inah a kâwm a, Mizo ṭhalaite tana a ngaih pawimawhte a sawipui.

Malsawmzuala Ralte chuan, Ministry of Port, Shipping & Waterway-in nikuma hmalakna tur an puan tawh, hmarchhak ṭhalai 50,000-te maritime/tuipui/lawng lama hna thawk thei tura training turin ruahmanna an siam chu Mizo ṭhalaite'n an chhawr ṭangkai ve theih nan Mizoramah training centre hawng ve turin Sarbananda Sonowal a ngen.

Union Minister chuan, Dibrugarh, Assam-ah training centre din tura ruahman mek a nih thu sawiin, Mizo thalai training duhte hming la khawm turin a lo hrilh a, "Chumi azir chuan Mizorama training centre din dan tur la ruahman theih a ni ang," a ti.

Union Minister-in ministry official-te nena sawiho tura a hrilh angin MYC Chairman hian Union Port, Shipping & Waterway official-te hi a sawipui nghal a ni.