Mizoram Governor thar Sreedharan Pillai lakluh a ni

Governor lak luhna inkhawm­ah hian chief secretary Lalnunmawia Chuaungo-in President Ram Nath Kovind kutziak leh seal chuang Warrant of Appointment a chhiar chhuak a, chumi hnuah Justice Ajai Lamba chuan PS Sreedharan chu rinawmna thu tiamtirin a la lut a ni.

Larsap lak luh inkhawmah hian  Assembly speaker Lalrin­liana Sailo, chief minister Zoram­thanga, minister te, MLA te, chief minister hlui Lal Thanhawla leh sorkar official-te an tel. Mizoram Governor atana lak luh a nih hnua thuthar thehdarhtute a kawmnaah PS Sreedharan Pillai chuan Vanglaini palai zawhna chhangin, BJP-a a nihna a bànsan tawh thu a sawi a, "Governor ni tura ruatna ka pawm hnuah BJP ka nihna aṭangin ka báng tawh. Insiam rem a har lo ang. Kerala BJP hruaitu ka nih lai pawhin Kerala Pradesh Congress Committee-in ka article min chhuahsak a ni," a ti.

Governor chuan, India danpuiin ti tura a tihte ṭha taka hlen chhuah a tum thu sawiin, "Mizoram hmasawnna atan theihtawp chhuah ka tum," a ti a; Mizoram mipuite'n harsatna leh mamawh an neihte zir chian a tum thu a sawi.

PS Sreedharan Pillai hi Decem­ber 1, 1953 khan Ven­m­ony, Alappuzha district, Kerala-ah a piang a, fapa leh fanu pakhat ve ve a nei. Zirna lamah B.A leh LLB a zo a, Kerala High Court-ah ukil hna a thawk ṭhin.

Kum 1978-ah BJP zirlai pawl - Akhil Bharatiya Vidyar­thi Parishad (ABVP)-ah Kerala state-ah secretary a ni a; politics a luhchilh tak tak hnuah kum 2003-2006 chhung Kerala state-ah BJP president a ni. Kerala BJP president ṭhin Kumanam Rajashekharan-a Mizoram Governor atana ruat a nih hnuah, kum 2018 aṭangin Kerala BJP president a ni leh a, Mizoram Governor atana ruat a nih thlengin he hna hi a thawk.

Hming            :    PS Sreedharan Pillai

State            :    Kerala

Thiamna        :    BA, LLB

Hna thawh    :    High Court ukil

Nihna            :    Kerala BJP president