Social media-ah thu dik tâwk lo a tam, AIR hi mipuiin thu dik an lakna ber a la ni - Home Minister

All India Radio (AIR), Aizawl chuan nimin khan an kum 60-na champha, diamond jubilee an hmunah an lawm a, minister K Sapdanga'n a hmanpui. Minister chuan, social media-ah thu dik tâwk lo tam tak a awm avangin AIR chu tun thlengin mipuiin thu dik an lakna ber a la nih thu a sawi.

K Sapdanga chuan, AIR chu rimawi leh thu hmanga mipui awi tleitu, chanchin thar puangtu a nih thu sawiin, "India rama thu puangtu hmasa ber a ni a, khawvel pum huap pawha radio network lian ber, ṭawng hrang hranga thu puang darh tam ber niin, ṭawng 180 chuanga ngaihthlak theih a ni a, India ram 92% tuam tawhin, mipui 99.91% hnen a thleng tawh a ni," a ti.

AIR-in Mizo mipui thinlungah hmun pawimawh a la chang reng tih sawiin Minister chuan, "Thu dik leh rintlak kan hriat theihna, min awm tleitu leh ṭhangthar tam tak chher chhuaktu a ni," a ti a; Mizo zaithiam tam tak chu AIR artist an ni a, AIR artist nih chu zaithiamte'n an hlut ber a la nih reng thu a sawi.

K Sapdanga chuan, AIR-in chanchin thar a puan leh social media-a thuthar a tihchhuahte chu mipuite tan a ṭangkai hle tih sawiin, "Radio-in a puang em tih chu mipuite thu dik leh dik lo tehkhawng ber pakhat a ni a, AIR thupuan chu dik lo thei loah kan ngai. Social media hmangin awlsam taka hmuh leh ngaihthlak theih awm mah se, a dik tawk em tih a pawimawh. Social media-ah thu dik tawk lo leh naupang hmuh atana remchang lo tam tak a awm a, politics-ah phei chuan inbeihna tam tak awm mah se, thu dik kan lakna ber chu AIR Aizawl a ni," a ti.

AIR chu hnam zia humhalhtu a nih thu sawiin Sapdanga chuan, "Tunlai changkanna nena inher remin mipui tan a la ding reng a ni," a ti a; thuthar thehdarh kawngah nasa zawkin ṭan la zel tur leh hlawhtling taka hmasawn zel turin duhsakna a hlan.

Home Minister chuan, Mizo ṭawng dik hman chungchangah AIR, Aizawl chu entawn tlak a nih thu sawiin, "Ṭawng humhalh kawngah Mizo mipui tana ṭangkai ber pakhat a ni. Documentary feature kaltlanga Mizote zinga mi entawn tlakte chanchin buatsaih leh zirtir nei ṭha tak tak ngaihthlak tur a awm hi a hlu hle," a ti a; AIR Aizawlin thu leh hla a puan chhuahte chu ṭhangtharte tan a hlut thu a sawi.

AIR, Aizawl chu sorkar pisa zinga hun vawng dik ber a nia a hriat thu sawiin K Sapdanga chuan, "Heng zawng zawng hi thawktu hmasate leh thawk mekte thawhrimna leh inpekna vang a ni," a ti.

AIR, Aizawl director DR Lalropuia sawi danin, AIR Aizawl Station hi July 31, 1966-ah din a ni a, transmitter watt 150 hmangin bul ṭan a ni. Tuna a awmna, Tuikhuahtlangah hian October 1972-ah an awm ṭan a, kum 1975 aṭangin chanchin thar puan a ni. Tun dinhmunah thawktu 300 chuang an awm a, chu'ng zinga mi 200 chuang chu programme kaihhnawihah a nghet loa thawk an ni.

Diamond Jubilee lawmna inkhawmah hian khuallian K Sapdanga'n souvenir a tlangzarh a; AIR, Aizawla lo thawk tawh ṭhin Vanneihtluanga'n thu a sawi bakah, zaithiamte an zai. AIR-a lo thawk tawh ṭhin te, AIR artist te, thuthar thehdarh kawnga an thawhpuite an tel a; zanriah kilho a ni.