Minister-in corporator-te a kawm

Minister of state Prof Lalnilawma chuan nimin khan a pisaah Aizawl Municipal Corporation (AMC) corporator-te a kawm a, inhawng tak leh inpawh tak chunga hna an thawhho a ṭul thu a hrilh.

PHE changtu Prof Lalnilawma chuan urban chu AMC lam chan a nih thu sawiin, "Kan tui dahkhawlna leh tui supply dan kawngahte leh mipui mamawhna hrang hrangah PHE dept chuan theihtawp kan chhuah mek zel. Mah se, sum hian kan mamawhna zawng zawngah min daih vek seng vek lo a, hetah hian kan AMC lam, a bikin kan corporator-te nen kan bial ah teuh kan tan ho a ngai hle," a ti.

PHE dept aṭangin theihtawp an chhuah zel dawn tih sawiin PHE Minister chuan, "AMC lam pawh theihtawpa an ṭan a ṭul," a ti a, thawhhona ṭha tak an neih chuan hna hi nasa takin an thawh theih dawn thu a sawi.

DMR changtu Minister Prof Lalnilawma chuan khuarel chhiatna Aizawl hmun hrang hranga thleng ṭhin chungchangah nasa lehzuala inpawh zawka an thawhho zel a ṭul tih AMC corporator-te hrilhin, "State sorkar lam chu kan inhawng reng," a ti a, inpawh taka thawkho a, an theihna zawnah ṭheuha mipui tan theihtawp chhuahpuiah a sawm.

Leivung a hmun lova paih avang te, insak dan fimkhur tawk loh vang te, lei laihdan kawngahte leh bawlhhlawh paihdanahte tun aia nasaa ṭan lak a ṭul tih sawiin Prof Lalnilawma chuan, "Thuneitute lam pawh tun aia nasa a kan ṭan a tul hle. Fimkhur tawk lohna avanga khuarel chhiatna thleng ṭhinte pumpelh tur hian sorkar thuneitute leh mipui thelnga ṭangrual a, thawho ṭhat a ṭul," a ti.

DMR Minister chuan leivung paih chungchang sawi zawmin, "Leivung a paihna hmuna paih a nih loh avang hian Aizawl khawpui mipuiten tui thianghlim supply mumal tak an hmu lo fo. Leivung a hmun lova paih avangin Tlawng lui leh lui dang a bawlhhlawh nasa thin hle," a ti a, fur lai phei chuan Aizawl khawpui chawmtu hi a nut nasat ṭhin harsatna an tawh nasat thu a sawi.

Prof Lalnilawma chuan leivung paih leh bawlhlawh paih lamah hian khauh taka dan kenkawh a ngai hle tih sawiin, AMC hotute chu theihtawp lo chhuah turin a ngen a, "Mipuite tana harsatna thlen loh theih dan ang berin, kan tuihna leh kan environment ti chhelo thei ang bera hma kan lak ho hi a ṭul takzet a ni," a ti.

AMC corporator-te hi mayor H Lalremtluanga'n hoin, state sorkar leh AMC-te thawhho ṭhat lehzual dan tur an sawiho a ni.