Minister hoin sensitization meeting nei

Agriculture & Farmers’ Welfare department leh Ministry of Commerce & Industry hnuaia Spices Board ṭangkawp chuan nimin khan Mizoram Agricultural Marketing Board (MAMB) Committee Room-ah sensitization meeting neih a ni a; Agriculture minister PC Vanlalruata'n a hmanpui.

PC Vanlalruata chuan, agriculture-a hmasawn zel theihna turin sorkarin Farmer Producer Company (FPC) chu thawhpui a tum thu a sawi a, "Sawhthing tihrona khawl (ginger drying machine) pawh sorkarin a ngaihven mek a, thlai chi hnih leh a aia tam chìn rual (inter cropping) chu kan ngai pawimawh a, uar zawka kalpui a ṭul," a ti a; FPC-te chu sorkar nena an thawhhona turah theihtawp chhuah tur leh inpuahchah turin a hrilh.

Spices Board deputy director BD Sharma pawhin thu sawiin, Spices Board hnuaia scheme hrang hrangte a sawifiah nghal.

Ṭhutkhawm hi MAMB managing director Lalhmingmuana'n a kaihruai a; Agriculture & Farmers' Welfare department leh Mission Organic Mizoram official-te bakah Mizoram hmun hrang hranga FPC leh Farmer Producer Organisation (FPO) aiawhte an tel.