Heroin, a phurtu leh Aizawla a lo dawngsawng turte an man

Bawngkawn Police, Special Anti Narcotics Team leh Assam Rifles ṭangkawp chuan July 30, Ningani khan heroin, a phurtu leh Aizawla a lo dawng-sawngtu turte an man.

Thudawn danin, Bawngkawn Police, Special Anti Naroctics Team leh Assam Rifles ṭangkawp chuan Seling Zero Point-ah Zoramchhana (19), Champhai Dinthar nia inchhal khalh super carry van MZ 04/B - 1215 chu rinhleh thilah lo ti dingin an endik a, hmanraw dahna (tool box) a thuhrûk heroin sahbawn bawm pakua leh Zoramchhana'n a taksa-a a thuhruk heroin sahbawn bawm pakhat an man.

Zoramchhana thu an zawhfiahna aṭangin heroin hi Chhani, Khawmawi, Myanmar-in Lalnunziri, Aizawla cheng hnena pe tura a thawn tih hriat chhuah a ni. Chhuizui nghal niin, Aizawla heroin lo dawngsawngtu tur nia Zoramchhana'n a sawi Lalnunziri, Ṭinghmun, Chaltlang Ruam Venga cheng mek leh a ṭhiante pahnih Lalremruati (39), Ramhlun Vengthar nia chhal leh Lalduhkima, Dur­tlang Leitan nia inchhalte chu an man leh a ni.

Seling Zero Point-a heroin an man zawng zawng hi gram 112.33, cheng nuai 22.46 hua chhût a ni.