KHAWTHLIR

Museum khar

Mizoram State Museum, Zarkawta mi chu MINECO-a an building tharah sawn mek a nih avangin August 1, 2026 aṭangin khar a ni rih dawn a; museum (MINECO) hawn hun tur hi hriattirna tihchhuah leh a ni ang.

MYC hnuaiah nail technician training

Mizoram Youth Commission (MYC)-in Mizo ṭhalaite tana a thlawna 'Nail Technician Training' a buatsaih chu nimin khan batch khatna zawh a ni a, a kharna hun MYC secretary V Lalmuanpuii'n a hmanpui. Nail technician training hi hmeichhia 25-in an zo a; MYC hian certificate bakah eizawnna bul an ṭanna atan hmanraw ṭul angte an pe. Training hi batch khat dang kalpui leh tur niin, training hun chhung hi batch tin tan thla khat zel a ni.

Kawng khar

Traffic SP Vanlalvena chuan thuchhuah siamin, Khatla High School Veng - Tuikual South High School inkar kawngah tuichhe paihna pipe phum hna thawh a nih dawn avangin nizan dar 9 aṭanga hna thawh zawh hma chu helai kawng hi khar a nih dawn thu a tarlang.

PMSSY 2.0

Serchhip district bawrhsap Paul L Khuma hoin nimin khan ‘District Level Committee on Pradhan Mantri Matsya Sampada Yojana (PMSSY) 2.0’ an ṭhukhawm a; sangha khawi leh dil siamtute hmasawnna tur hrang hrang ngaihtuahin, kumin atana hmalakna tura duan, Annual Action Plan for 2026-27 an pawm.

Vawk lakluh khap

Mamit district magistrate Suvigya S Chandra chuan hriattirna tichhuakin, Mamit district-ah ramdang (foreign) leh state dang bakah, ASF infected area/district danga ASF lenna aṭanga vawk, vawksa rep leh vawksa aṭanga siam lakluh khap a nih thu a puang a; vawk damlo hralh/talh phal a nih loh thu leh thupek zawm lote chu dan anga hrem theih an nih thu a tarlang.