Dan hmanga rolrelna a pawimawh tial tial dawn - Chief Minister

Chief minister Lalduhoma chuan nimin khan Mizoram Law College-ah Student Bar Council buatsaih zirlai pass tharte thlahna leh a lut thar turte lawmna, 'Freshers Social & Felicitation' a hmanpui. Chief Minister chuan, dan hmanga rorelna (rule of law) a pawimawh tial tial dawn tih a sawi.

Lalduhoma chuan, khawvel a changkang zel a, mi tinin an dikna chanvo an ngaihlu chho zel tih a sawi a, "Dan hmanga rorelna (rule of law) a pawimawh tial tial a, dan lam thiamte kan mamawhna a pung zel. Law behchhana hnathawktute hi mimal zalenna te, rorelna dik leh mipui sorkarna, kan ram kalphung lian pathum insuihfinna laia hnathawktute in ni a, ram danpui humhimtu, khua leh tuite dikna vengtu leh rorelna dik chelh dingtute in ni," a ti.

Zirlai kal chhuak turte chu an degree ni loin, an hnathawh aṭang zawkin teh an ni dawn tih sawiin Chief Minister chuan, "Taima taka in inzir zui zel a ngai a, in nun pawh in uluk a ṭul dawn a ni," a ti a, zirlai lut tharte pawh lawmpuiin, hlawhtling taka zir chhuak turin duhsakna a hlan.

Student Bar Council-in collge bus tur an lo dil chungchangah Chief Minister chuan pek a tum thu a hrilh nghal a ni.

Freshers Social & Felicitation-ah hian Law College principal Dr Esther L Chhangte pawhin thu a sawi a; Law College-ah hian zirlai 180 leh teaching faculty 11 an awm mek.