Floriculture centre sakna tur lungphum phum

Horticulture director CH Lalmuan-puia chuan July 30, Ningani khan Nghalchawmah Mizoram Florists' Association Floriculture Centre sakna tur lungphum a phum. Centre-ah hian pangpar chi hrang hrang khawi a ni a, kar tin Thawhṭanni tih loh zawngah ni tin mipui tan tlawh theiha hawn a ni ang.

CH Lalmuanpuia chuan, Mizoramin pangpar chi hrang hrang - cut flower, house plant leh seasonal flower a intodelh nan Mizoram sorkar chuan nasa takin hma a la tih a sawi a, "Tunah hian Delhi leh Singapore-ahte anthurium thawn chhuah mek a ni a, rélin a phurh tham tur thar a ṭul," a ti.

Floriculture Centre-ah hian MIDH 2025-26 scheme hmangin Horticulture department leh Mizoram Florists' Association ṭangkawp chuan pangpar chi hrang hrang - tulip (curcuma) zamzo, nihawi (sunflower), anthurium leh pangpar chidangte an chîng mek a; cold storage leh hmunhma pawimawh dangte sak mek a ni. Nimin aṭang khan a duh apiang tana tlawh theih tura hawn ṭan niin, kar tin Thawhṭanni tih loh ni dang zawngah tlawh theih a ni a, mi pakhat tan entry fee Rs 50 a ni.

Mizoram Florists' Association hian Chaltlang Dawrkawn Bazar building-ah heng an pangpar tharte hi a zawrhna leh dahṭhatna (cold storage) an nei bawk.