Health Minister-in PHC a hawng

Health minister Lalrinpuii chuan nimin khan NE Khawdungsei Primary Health Centre (PHC) building a hawng.

NE Khawdungsei PHC hawnna inkhawmah Health Minister Lalrinpuii chuan, Mizoramah doctor indaih lo karah sorkar hmalaknaa medical officer awm thlapa NE Khawdungsei PHC changtlung tak hawn a ni thei chu lawmawm a tih thu a sawi a, "Doctor indaih lohna phuhru turin sorkarin hma a la chho mek a, ZMC-a zirlaite chu sorkara an thawh theih nan bond year an sign ṭhin," a ti.

Bialtu MLA F Rodingliana, minister of state pawhin thu sawiin, "Kum 20 chuang hman mumal loha awm tawh NE Khawdungsei PHC hi ṭangkai taka hman a ni thei tawh tur hi a lawmawm takzet a, a hlawhtlinna kawngah pawh mipuite thawhhona a ṭha hle a ni," a ti a; Health Minister hmalaknaah lawmthu sawiin, mipui pawhin ṭangkai taka an hman theih nan duhsakna a hlan bawk.

NE Khawdungsei PHC hi November 19, 2024 aṭanga sak ṭan a ni a, May 18, 2026 khan sak zawh niin, casualty, male & female ward, main centre, kitchen, consultation room, delivery room, preparation room, ophthalmic assistant room, minor OT, labora-tory, Ayush room, allopathy room, nurses changing room, X-ray & dark room leh toilet block-te a awm.