Tlangnuamin AIFF Futsal Champion an lawm

Tlangnuam khawtlang chuan nimin khan an Community Hall-ah All India Football Federation Futsal Championship 2025-26 champion lawmna an buatsaih a; chief minister Lalduhoma'n khuallian nia hmanpuiin, Sports minister Lalnghinglova Hmar, bialtu MLA Lalchhuanthanga leh bialtu corporator Dr Lalmalsawma Nghaka ten an telpui.

Lalduhoma chuan, Tlangnuam Futsal Club-te a lawmpui thu sawiin, "Vawi khat champion-ah hian in duh tawk mai ang tih ka hlau a, Asia khawmualpui huapa inelna AFC Asian Futsal Cup a la awm a, chu mi chungah chuan khawvel huapa FIFA hnuaia inelna Futsal World Cup-te a la awm zel a, heng inelna sang zawk hi in thlir phak tur a ni," a ti.

Chief Minister hian Tlangnuam Futsal Club hnenah hian pawisa a hlan a; National Powerlift gold medalist Abraham Lalṭhakima hnenah chawi-mawina hlan a ni bawk.