MYC Chairman-in Taiwan ram palaite kawm

Mizoram Youth Commission (MYC) chairman Malsawmzuala Ralte chuan nimin khan New Delhi-ah Taiwan ambassador Dr Mumin Chen chu a pisaah kawmin, Mizo ṭhalaite tana hmalakho theih dan tur an sawidun.

MYC Chairman leh Taiwan ram palaite hian India-Taiwan Labor Mobility Agreement, 2024 hnuaia Taiwan-a hna-thawk tura Mizo ṭhalai tirh chungchanga hmalakho meknate an sawi a; Dr Mumin chuan, Taiwan–ah November thla khian mid-term election a awm dawn avangin hmalakna a kal muan thu leh theihtawpa kawng an dap zel thu a hrilh.

Dr Mumin hian Mizorama kût rawn chhim paha Taiwan company hrang hrang leh Taiwan Chamber of Commerce in India-te rawn zin pui a, Mizo ṭhalaite tana hnathawh theih tur remchang ngaihtuah ho ṭha a tih thu a sawi a; Mizoram leh Taiwan-in inlaichinna leh thawhhona ṭha neih zel a duh thu a sawi bawk.

Malsawmzuala Ralte hian Taiwan Embassy-a education changtu Jill Lai pawh kawmin, Jill Lai hian Taiwan–a Mizo ṭhalai lehkha zir duh leh mandarin ṭawng zir duhte tan scholarship an neih thu leh, Mizo ṭhalai a tam thei ang berin chhawr ṭangkai se a duh thu a lo hrilh bawk a ni.

MYC Chairman hi Delhi-a cham mek OSD to CM Jonathan Lalremruata'n a ṭawiawm.