SBI hminga mutual fund kalpuitu Mi pathumte police-in an man

State Bank of India (SBI) hminga mutual fund kalpuitu mi pathumte chu November 4, Thawhṭanni khan police-in an man. Police-in an hriat theih chinah, heng mi pathumte hnenah hian mi hrang hrangin cheng nuai 200 vel an dah tawh a, a tak takah chuan chu aiin a tam rin a ni.

Police lamin an chhui zui mek avangin an an mimante hming hi an la tlangzarh lo a, SBI Regional Business Office thuchhuahah mi pahnih hming erawh puanzar a ni. Police hotute aṭanga thu dawn danin, SBI aṭanga FIR an dawn bawhzuiin, SBI hminga mutual fund kalpui hi chu an chhui chiang a; mi pathumte chuan Mizo Overseas Employment Agencies tia invuahin, Upper Khatla-ah pisa an hawng a, a kaihhnawihah hmeichhe pahnih leh mipa pakhat an man.

Mi pathumte thu an zawhfiahna aṭanga a lan danin, pawisa 24% a pung turin an inzuar a; Darlawn leh Thingsulthliah velah an inzuar nasa a, hriat theih chinah an hnenah cheng nuai 200 vel dah a ni tawh. SBI Regional Business Office, Aizawl chuan thuchhuah siamin, Mizo Overseas Employment Agencies hminga partnership registration nei, J Rosangpuia leh Malsawm­tluangpuii ten SBI Mutual Fund hminga B Sang­chema Building, Upper Khatla-a office an hawng leh, media lamah SBI Mutual Fund hmanga advertisement an tihte chu SBI-in an hriatpui lo tih an tarlang.

SBI chuan, Mizoram hmun hrang hranga mutual fund investment an zawrh ṭhinte pawh SBI hriatpuinaa kalpui a ni lo tih tarlangin, "Customer-te hnena 24% interest return an tiam hi SBI chuan a duh lo tawp a, investment zawrh chhuahna dik lo (mis-selling) leh mipui bumna a ni," an ti.

SBI tarlan danin, mutual fund investment hi Association of Mutual Funds in India (AMFI) hnuaiah application reference number (ARN) code neite chauhin mipui hnena an zawrh theih a ni a; Mizo Overseas Employment Agencies erawh chuan ARN code an nei lo.

SBI thuchhuah chuan, ARN code nei tan pawh mahni duh thua SBI Mutual Fund office hawn phal a ni lo tih tarlangin, "Mutual fund investment-ah interest rate fix (bithliah/tuk) theih a ni lo. Hetianga dik lo taka mutual fund investment zuartute lakah mipuite fimkhur lehzual turin kan chah a ni," a ti.

• SBI hming an hmang a, nuai 200 chuang an la tawh

• Mizo Overseas Employment Agencies tiin an invuah

• Customer-te hnenah 24% interest return an tiam

• SBI lamin ringhlelin police hnenah FIR an thehlut

• Police-in mi pathum an man tawh

• SBI thuchhuahah mi pahnih hming an puangzar