Rengtekawn-Builum panna kawng siamnaa lung hman a ṭha tâwk lo tih MJA-in an finfiah

Rengtekawn aṭanga Builum panna kawng, Pradhan Mantri Gram Sadak Yajona (PMGSY) sum hmanga siam mekah an lung hman a ṭha tâwk lo tih thu an sawi avangin Kolasib District MJA member-te chuan nimin khan a hmunah an enfiah a; lung an hman chu PWD pawm theih chin ni mah se, duhthusam a tling lo tih an finfiah.

Kolasib MJA tarlan danin, Rengtekawn-Builum kawng chu km. 12.59-a thui niin, metre 6-a zau tur a ni a, metre 3-a zauah granular sub base (GSB) milimetre 125-a chhaha phahin, a chungah concrete pavement mm. 100-a chhaha siam leh tur a ni.

Kawng siam hna chu contractor paliin an thawk a, km. 0-3 chu Colleen Lalsangpuii, Zarkawt, Aizawlin thawkin, Rs. 4,46,35,984.84 sênna tur a ni. September 18, 2018-ah thawh ṭan a ni a, kum khat chhunga thawk zo tura tih ni mah se, a zawh hman dawn loh avangin February 19, 2020 thleng hun pek belh a ni.

Km. 3-6 inkar chu Lalparmawia, Hlimen, Aizawl thawh niin, Rs. 3,90,54,918.89 ruahman a ni a, ani pawh hian a thawh zawh hun tur September 17, 2019-ah a thawh zawh hman loh avangin March 23, 2020 thleng hun an pawhseisak.

Rs. 3,54,84,013.58 hmanga thawh tur km. 6-9 chu H Sapthangliana, Chaltlang, Aizawlin a thawk a, September 26, 2019-a zawh hman tur  a nih laiin, a zo hman lo a, May 9, 2020 thleng hun an pawtsei. Km. 9-12.59 inkar chu P Lalbiaka, Zonuam, Aizawlin thawkin, Rs. 6,90,92,935.91 man a ni a, September 22, 2019-a thawh zawh tur ni mah se, a thawh zawh hman loh avangin April 8, 2020 thleng hun pawhseisak a ni. 

Km. 0-9 inkar chu contractor pathum hminga ṭhen ni mah se, a thawktu tak chu F Lalramchhana, Aizawl leh Beneson Consultancy-te an nih thu, kawng siam enkawltu David Malsawmdawngliana'n MJA member-te a hrilh a; kawng laih (formation cutting) bik chu an zo tawh a, permanent work (culvert siam leh thil dang) chu 95% vel thawh zawh a nih tawh thu a sawi.

Kawng siamna turin kawng kama quarry an leia lung an hmang a; lung chu water absortion test-ah PWD-in a pawm theih chinah 50% a nih laiin, 46.8% chiah a ni. Lung chu GSB atan an hmang dawn tih David Malsawmdawngliana'n media-te hrilhin, concrete pavement atan erawh chuan hmun dang aṭangin lung an lak dawn thu a sawi a; kawng laihah zángnadawmna phût an awm avangin hmun ṭhenkhatah chuan a zauh tur ang a tling thei lo tih a sawi bawk.

Kolasib MJA hruaitute chuan, kawng chu PMGSY hmanga siam a nih avangin, a hnu lama thawm ṭhat a ngaih pawha thawm ṭhatna turin state sum hman a ngaih tawh dawn avangin, uluk leh ṭha taka siam turin contractor-te an ngen a ni.