KHAWTHLIR

Bethlehem Venglai North Branch KṬP chuan an branch din champha vawi kuana pualin nimin khan an kohhran hall-ah blood donation camp an huaihawt a, Aizawl Civil Hospital tan mipa 25 leh hmeichhia pakhatte'n thisen unit 26 an pe.

Aizawl Civil Hospital (ACH) Blood Bank chuan October 2019 chhung khan thisen unit 2,118 an dawng a, chu'ng zinga unit 2,049 (97%) chu a thlawna pek (voluntary donation) niin, unit 69 chu pek bik neia pek (replacement donation) a ni. ACH Blood Bank hian October thla chhung khan blood donation camp ṭum 20 an nei a ni.

MNF party chuan thu­chhuah siamin, Mizo­ramin Governor thar a nei leh ta chu lawmawm an tih thu an tarlang. MNF chuan, "Hun eng emaw chen Mizoramin Larsap kan neih loh hnuah, Governor thar atan PS Sreedharan Pillai, Kerala lam mi lak luh a ni ta hi lawmawm kan ti tak zet. Consti­tutional head a nih angin Mizoram tan a mawhphurhna ṭha taka a thawh ngei kan duhin, beseina kan nei sang hle a ni," an ti.

Ṭhuampui Branch YMA chuan nimin khan Ṭawngṭai Bethel Camping Centre (TBCC) hnenah pawisa, ei tur leh bungrua, a vaiin Rs. 1,76,450 hû an hlân a; Central YMA vice president Lalhmachhuana'n a ṭawiawm. TBCC-ah hian mi 690 an awm mek a, camper mipa 534 leh hmeichhia 147, naupang pali, thawktu mi paruk an ni.

Kolasib-a awm mek IPRO Collin Hlychho, MIS chu MCS-ah a tlin avangin Lungleiah SDC-in a awm dawn a, Kolasib a chhuahsan dawn tawh avangin Kolasib MJA-te chuan nimin khan Kolasib Press Club-ah an thlah. Kolasib MJA hruaitute chuan, Collin Hlychho chu Kolasib-a IPRO hna a thawh chhungin a thawk ṭha hlea an hriat thu leh Kolasib-a chanchinbumite pawhin hma an sawn phah hlea an hriat thu an hrilh a ni.

Mamit Bazar Venga Bethany Solace Home (Swadhar Greh) chu nimin khan Revd. Sister M Joy, North East Provincial Superior-in a hawng a, Aizawl bishop Most Revd. Stephen Rotluanga'n Pathian hnenah a hlan. Home hi hmeichhia kum 18 chin chung lam, belh tur nei lo leh dinhmun tleu tawhte kum thum thleng an awm theihna tur a ni a; kum 55 aia upate chu kum nga thleng an awm theih dawn bakah, kum nga hnuah old age home-ah sawn theih an ni ang.