Forester leh forest guard training zote thlah an ni

Bethlehem Vengthlanga Forest Training School-ah forester batch 25-na leh forest guard batch 33-na training chhuakte thlahna hun July 31, 2026 khan hman a ni a, Environment Forest & Climate Change (EFCC) minister Lalthan-sanga'n a hmanpui.

Forest Training School-a inzir forester mi pathum leh forest guard mi 20 te February 2, 2026 khan training an ṭan a ni. Training zote thlahnaah hian training chhunga ti ṭha thlan chhuahte hnenah EFCC Minister-in lawmman a hlan.

Lalthansanga chuan, forester leh forest guard training chhuakte a lawmpui thu a sawi a; EFCC department hmel lanna tur, mipui nena inhne hnai turte an nih avangin dik tak leh rinawm takin hna thawk tur leh, anmahni leh department hmel mawina vawng nung turin a chah.

Khawvel ṭhang zelah ramngaw leh nungchate hlutna a lang chiang tial tial tih sawiin EFCC Minister chuan, "Mizoramah pawh kan ramngaw leh nungchate kan humhalh that lehzual a ṭul. Chak zawka hma kan lak theih nan Forest department thuam chak zel Mizoram sorkarin a tum a ni," a ti.