KHAWTHLIR

MLA-in hmanpui

Hnahthial College chuan July 31, 2026 khan an auditorium-ah zirlai chhuakte thlahna leh zirlai lut tharte lawmna hun an hmang a, bialtu MLA Jeje Lalpekhlua'n a hmanpui. Jeje Lalpekhlua chuan, khawtlang tana theihtawp chhuah chunga lehkha zir tur leh aia upate zahna lantir ṭhin turin zirlaite a chah. Hnahthial College-ah hian department pasarih awmin, zirlai 128 an awm mek a ni.

Loan rûl ṭha lote chungchang sawiho

Kolasib sub-divisional magistrate H Lalramliana, Mizoram Public Demand Recovery Act (MPDRA) hnuaia Kolasib district certificate authority ni bawk hoin July 31, 2026 khan Kolasib-a bank hrang hrang aiawhte an ṭhukhawm. Kumin April leh May thla chhung khan loan la, rùl lo case 179 thehluh a ni a, hlawhtling taka chinfel a nih tawh thu tarlan a ni. Ba rùl ṭha lo mi 52 chu thuneitute hmaah an bá an rulh theih loh chhan sawifiah tura koh mek an nih thu tarlan a ni bawk.

NQAS sawiho

Khawzawl District Quality Assurance Committee (DQAC) chu July 31, 2026 khan additional DC K Zorammuana hoin an ṭhukhawm a, hmalak dan tur an rel. DQAC hian Khawzawl district-a District Hospital, community health centre, primary health centre leh health & wellness centre ten National Quality Assurance Standards an phak ve theih nan leh, state leh national level-a certification an neih theih nan chak zawka hmalak an rel a ni.

Kolasib dist tlawh

Mizoram sorkara secretary, Chief Secretary mawhphurhna la mektu (incharge) Sudhir Kumar chuan August 1, Inrinni khan Kolasib a tlawh. Sudhir Kumar hian district hotute kâwmin, department hrang hrangte harsatna, hmalak dan leh hmachhawpte a sawipui a; Kolasib district-a NH kawngpui thlûr li (four lane) tura laih mek a endik bawk.

AR-in meizial an man

Assam Rifles sipaite chuan July 31, 2026 khan Selingah TATA Sumo Gold aṭangin ram dang meizial - ORIS báwmpui (carton) 5 leh Esse Lite báwmpui 15 an man a, cheng nuai 51 hû a ni. Foreign cigarette neitua pu mi pakhat an man nghal bawk a, Customs department hnenah an hlan chhâwng.