Champhai district-ah pensioner 1,361 leh family pension la 547 an awm mek

Champhai District Treasury Office chuan tun hnai khan Thangtea Hall-ah mahni duhthua Pension Payment Order (PPO) hlan let chungchang inhrilhfiahna an buatsaih a, bawrhsap Mohammad Aaquib-a'n a hmanpui. Champhai district-ah pensioner 1,361 leh family pension la 547 an awm mek.

Tarlan danin, Champhai district-ah pensioner 1,361 awm mekin, pensioner-te tan hian sorkarin thla tin Rs 4,52,24,491 a sêna a; family pensioner 547 an awm bawk a, an tan sorkarin thla tin Rs 1,34,37,331 a sêng ṭhin a ni.

Mohammad Aaquib chuan, family pension (sorkar hnathawkte an thih hnua an chhungte'n pension an lak zui) chu chhungkaw tam takin ṭangkai taka an hman mek thu a sawi a, "Hetihlai hian, mi ṭhenkhat chuan dik lo takin an hmang tih Mizoram sorkarin a hria. Dik lo taka pension la ṭhinte hian sorkar pawisa tam tak dik lo takin an ei ral a, dik tâwk loa pension an lak theih nan lehkha pawimawh lem an siam ṭhin," a ti.

Dik lo taka pension lak tihbo a nih theih nan sorkar hnathawkte bakah, tlawmngai pawlte leh mipui an pawimawh thu sawiin Bawrhsap chuan, "Khawtlang hruaitute, YMA leh kohhran hruaitute'n lehkha an siamsak tawh chuan sorkar department-a thawkte tan lo hnar a theih loh tluk a ni tawh ṭhin," a ti a; pension dilna atana lehkha pek chhuahah fimkhur turin khawtlang hruaitute leh kohhran hruaitute a chah.

Champhai DC chuan, September 31, 2026 hnuah sorkarin district tinah district level task force a din dawn tih sawiin, "Task force-te hian chak takin hma an la dawn a, dik lo taka pension late an dîm dawn lo," a ti a; dik lo taka pension latu hriate chu sorkara hriattir hreh lo turin a ngen.

Mizoram sorkar chuan dan loa family pension late tan September 30, 2026 thleng an pension surrender-na hun a hawng mek a; hun tiam chhunga surrender-te chu ngaihdam an ni dawn a, surrender lote chu dan anga hrem tum a ni.