Bána Kaih Phase-II loan dilna endik

Mizoram State Project Coordination Committee (MSPCC) vice chairman Dr KC Lalmalsawmzauva kaihhruaiin July 31, 2026 khan Bána Kaih scheme kalpuitu department-a nodal officer-te leh SBI, MRB, MCAB hotute an ṭhukhawm a; Bána Kaih Phase-II hnuaia loan dilna 68 leh Chief Minister's Special Package dilna 1,492 an endik.

MSPCC Vice Chairman chuan, Bána Kaih chu kut hnathawktute kaih chhuahna scheme, thiamna leh theihna nei mi taima leh tumruhte eizawnna bul ṭanna tur leh ram tihhmasawnna tura hmanraw ṭangkai a nih thu a sawi a, "Dilna lutte uluk taka endik a pawimawh. Dilna lut thlitfim hna a hun taka kalpui a nih theih nan leh sorkar thawhpui theih tur progress partner ṭha thlan ngei a nih theih nan implementing department-a nodal oifficer-te inpekna a pawimawh," a ti.

Ṭhutkhawmah hian AH & Veterinary department aṭanga CM Special Package dilna 872 leh Commerce & Industries department hnuaia CM Special Package dilna 504 bakah, loan dilna 68 endik a ni a; loan pek tura dilna pawm tawh, chhan eng emaw vanga bank-in an la pek theih loh dilna 29 enho a ni.

Postal department nena thawhho dan tur te, Bana Kaih kalphung tihchangtlun lehzualna tura 'Last Mile Connectivty' kalpui dan tur te, progress partner-te hmalakna en zuina tur leh mipui hnena scheme kalphung zirtirna kalpui dan tur te, Handholding Mela buatsaih dan tur te, Handholding Scheme Phase-III kalpui dan tur sawiho a ni bawk.