Police-in hmun 3-ah ruihhlo an man

Mizoram Police chuan July 31, Zirtawpni leh August 1, Inrinni khan hmun pathumah methamphetamine leh heroin an man.

Saitual police-te chuan July 31 khan Manipur aṭanga Aizawl pan truck MZ-05 A-8053 chu Keifang daiah an lo endik a, driver ṭhutna chhunga thuhrûk methamphetamine kg 72.514 hmuh chhuakin an man. Hei hi Saitual district-a ṭum khata meth man tam ber a nia hriat a ni.

Truck khalhtu chu ramhnuaiah a tlanbo hman a, nimin thleng khan hmuh a la ni lo. Lirtheia chuang Kaidul Islam Laskar (21) leh Rafik Uddin Barbhuiya (32), Hailakandi district, Assam-a ve ve nia inchhalte chu man an ni. Chhui zuina kal zelah, ruihhlo tawlhrûka inhnamhnawih nia hriat Vanlallawmi (39), Bairabia chu Kolasib Police-te ṭanpuinain Bairabi aṭangin man zui a ni bawk.

Champhai police-te hian August 1, Inrinni chhun dar 11:30 vel khan Champhai aṭanga Aizawl pan maxicab pakhata cuang Vanlalmuana (27), Tahan, Myanmar hnen aṭangin heroin gram 118 an man.

August 1 vek chawhnu dar 1:30 khan Champhai police-te'n Champhai aṭanga Aizawl pan Tata LP Truck MZ-04 8669 aṭangin methamphetamine kg 9.796 (mûm 1,01,000) an man bawk a; truck khalhtu Vanlalruatsaka (32), Melbuk, Champhai district nia inchhâl pawh man nghal a ni.