PWD-in NHIDCL hnenah NH-54 a hlân

National Highway-54 ṭhenkhat, Zemabawk dái aṭanga Tuipang inkar chu National Highways & Infrastructure Development Corporation Limited (NHIDCL) enkawl turin November 1, 2019 khan Mizoram PWD-in a hlan. Hei hi Ministry of Road Transport & Highways (MoRTH) ruahmanna anga tih a nih thu, sorkar thuchhuah chuan a tarlang.

Sorkar thuchhuah tarlan danin, NH-54 Aizawl-Lunglei chu BRO kut aṭanga Mizoram PWD hnena pek turin MoRTH chuan May 6, 2008-ah thupek a siam a; Silchar leh Aizawl inkar enkawl hna pawh PWD kutah September 26, 2008 khan pek leh a ni a, mahse, April 2010-ah BRO-in PWD kutah a hlan a ni.

PWD-in kum kua an enkawl hnuah Zemabawk-Tuipang kawng chu thlûr hnih (double lane)-a siam turin NHIDCL kutah hlan a ni leh ta a; NHIDCL hian hlawm pariatah ṭhenin, contractor pariatin an thawk dawn a, Japan International Cooperative Agency (JICA) aṭanga loan lak hmanga siam a ni dawn.

NHIDCL hi National Highway Authority of India (NHAI) ang deuha India sorkar laipui ta a ni a, India hmarchhak state zawng bakah, Jammu & Kashmir leh Himachal Pradesh-a NH kawngpuite chu state sorkara PWD nen chan insemin an enkawl dawn a ni. NHIDCL general manager chu SIRD building, Leitanah a awm a, Serchhip, Lung­lei leh Lawngtlaiah project manager office dah a ni bawk.