One Stop Centre hawn a ni

Ministry of Women and Child Development hnuaia Lawngtlai district-a hmei­chhe baihvaite tlûk luh lailâwkna tur din thar, 'Sakhi - One Stop Centre' chu nimin khan Lawngtlai DC Shashanka Ala-i'n a hawng.

One Stop Centre hi hleilenna chi hrang hrang tuar hmeichhiate'n vanduaina emaw, an sutkian zawh loh harsatna an tawh emawa an tlûk luhna leh inhumhim lailâwkna tura din a ni. Thawktu mi pakua an awm a, ṭum khatah mi panga awm theihna tur a ni. Mi pakhat ni nga leh zan nga an awm thei a, chumi hnuah pan tur dang an hriat loh chuan hun rei zawk awm theih nan home danga an awm zui theih dan tur ngaihtuahsak ṭhin an ni dawn a ni.