A ṭha ber nih tum tur a ni - Assembly Speaker

Aizawl North College chuan nimin khan Vanapa Hall-ah zirlai lut tharte lawmna, Freshers' Social an hmang a; an hun hmanpuitu Assembly speaker Lalbiakzama chuan, a ṭha ber nih tum turin zirlaite a fuih.

Lalbiakzama chuan, zirna chu kawng tinrenga changkanna nei tura mi chhertu a nih thu a sawi a, "Lehkha thiamte chu kan hnathawhna hmun apiangah, officer lian aṭanga a tê ber thlengin, sorkar hna tak thawk emaw, kut hna kan thawk emaw, a ṭha ber nih kan tum tur a ni," a ti.

Mizoram sorkar hnuaiah sorkar hna indaih lohna a nasat thu sawiin Assembly Speaker chuan, "Hetihlai hian, sorkar laipui hnuaiah Staff Selection Commission hna exam tur a awm reng," a ti a; sorkar laipui lama hna awmte zirlaite'n ngaihven nachang an hriat a ṭul thu a sawi.