KHAWTHLIR

Thlalak thawh theih

IPR department chuan Mizoram Calendar 2027-a chuang tur thlalak thehluh theih a nih thu an tarlang. Thlalak chu RAW format-a thehluh tur a nih rualin, RAW-a thla la thei lo tan original jpeg image of TIFF-a thehluh tur a ni a, thlalak khawih danglam (edit) pawm a ni lo. August 31, 2026 thleng IPR Directorate-ah leh e-mail diprmizoram@gmail.com ah thehluh theih a ni a; thlalak nihna/hming, thla latu hming, khua/veng leh phone number tarlan tur a ni.

Hamṭhatna pe

OSD to chief minister R Lalrodingi chu Mizoram sorkar chuan hamṭhatna a pek belh. DPAR (General Service Wing)-in July 31, 2026-a notification a chhuaha tarlan danin, R Lalrodingi hi official car leh a khalhtu pek a ni a, Mizoram sorkara secretary-te dawn ang hamṭhatna chi hrang hrang pek a ni bawk.

Tuialhthei zawrh khap thu puang

Aizawl district magistrate Lalhriatpuia chuan thupek chhuahin, Aizawl district-ah phalna nei loa petrol leh diesel zawrh khap a nih thu a tarlang. Thupek zâwm loa dan loa zuarte chu an petrol/diesel man a nih dawn thu leh, dan hmanga hrem theih an nih thu a tarlang.

Ruihhlo do sawiho

Aizawl District AIDS Prevention and Control Committee chu August 3, Thawhṭanni khan an chairman Lalhriatpuia, bawrhsap kaihhruaiin kohhran hrang hrang hruaitute nen an ṭhukhawm. Ṭhutkhawmah hian DAPCC leh kohhran hrang hrangte HIV/AIDS leh ruihhlo donaa thawhho dan tur sawiho a ni.

Nihawi chìn beihpui

Khawzawl District Agriculture Office (DAO) hmalaknain NMEO - Oilseeds hnuaiah Khawzawl district-a khaw hrang hrangah nihawi (sunflower) chìn pawimawhna inzirtirna leh nihawi chi sem beihpui thlak mek a ni. Khawzawl district-ah hian loneitu mi 2,000 chuangin buh, sawhthing leh thlai dang karah nihawi chíng tel turin DAO-ah an inhriattir tawh.

ZPM Zonu lawm

ZPM Zonu chuan thuchhuah siamin, Mizoram State Human Rights Commission chairperson atan Marli Vankung leh member atan K Lalrinzuali ruat an ni chu lawmawm an tih thu an tarlang a, "ZPM sorkarah hmeichhiate'n dinhmun pawimawh tak tak an chang hi lawmawm kan ti a, ZPM kaihhruai Mizoram sorkar hi thlamuanthlak kan ti hle," an ti. Marli Vankung leh K Lalrinzuali te an chhuan thu sawiin, duhsakna an hlan a ni.

Member lawm lut

Mizoram Agriculture Service Association chuan nimin khan Agriculture Directorate-ah Mizoram Agriculture Service-a lut thar mi 14 an lawm lut. Inkhawm hi MASA president VL Hmangaihchhunga'n a kaihruai a, thusawitu Agriculture director Vanramthangi chuan, kut hnathawktute chawi sàn leh ṭanpui chu an thawh chhan ber a nih thu sawiin, taima leh chhel taka thawk turin a fuih. MAS junior grade mi 14-te hi July 2026-a MPSC kaltlanga lak an ni.

Bawlhhlawh paih lirthei vailiam

Serchhip district bawrhsap Paul L Khuma hoin nimin khan Serchhip District Water & Sanitation Mission an ṭhukhawm. Bawrhsao hian Serchhip district-in Swatch Bharat Mission (Gramin) aṭanga bawlhhlawh paih lirthei (Bolero Pik-up) pahnih a vailiam a; Serchhip district-a khaw enkawl fai ṭha khaw 15-te hnenah vantlang bawlhhlawh báwm 205 sem bawk.