PMMVY-ah nau pai 3,276 ziak lut tawh; 2025-26 chhungin mi 5,841 ṭanpuina pe

Directorate of Women & Child Development chuan nau paite'n hamṭhatna an dawn theihna, Pradhan Mantri Matru Vandana Yojana (PMMVY)-ah sorkar kum kal mek atan Mizoramah nau pai 3,276 an ziak lut tawh a; kum 2025-26 chhung khan mi 5,841 hnenah ṭanpuina pek a ni.

Women & Child Development hotute hnen aṭanga Vanglaini thu dawn danin, sorkar kum kal mekah PMMVY scheme hnuaiah nau pai 3,276 ziah luh an ni tawh a, chu'ng zinga mi 2,810 chu hamṭhatna dawng turin document tihfel a ni tawh.

PMMVY hnuaiah hian fa tìr paite'n Rs 5,000 an dawng thei a, fa pahnihnaah hmeichhia a nih chuan Rs 6,000 an dawng thei. Kum 2025-26 chhung khan Mizoramah nau pawm 5,841 hnenah ṭanpuina pek a ni a, chu'ng mite pawisa dawn belhkhawm chu Rs 2,79,68,000 a ni.

June 15 - July 15, 2026 chhung khan India ramah PMMVY Enrolment Drive neih a ni. Mizoramah chuan WCD-in nau pai mi 1,190 an ziak lut a, India rama state leh union territory 36 zingah Enrolment Drive-a tiṭha pariatna a ni.

Naupai/naupawmte hi Anganwadi-ah inziah luh hmasak tur a ni a, an inziah luh hian pawisa an dawng nghal lo a, nu leh naute hrisel tak an nih theih nan tih ve tur hrang hrang - sub-centre a ante-natal checkup, damdawi-ina nau neih, naute pian hnua vaccine lak tirte an tih ve a ngai. Naute nu bank account-a pawisa lut tur hian an account neihna chu Aadhaar leh phone number nen thlunzawm a, DBT a tlang theih nan NPCI mapping-te an lo tih ve a ngai bawk.

PMMVY-ah hian kum tluanin a inziah luh theih a, hamṭhatna dawng kim turin naupai ṭan aṭanga thla thum chhunga inziah luh tur a ni. A thlawnin mahni veng Anganwadi-ah inziah luh theih a ni a; fa pakhatna leh pahnihna tur pai mekte chu PMMVY-ah hian inziak lut ṭheuh turin WCD chuan an sawm a ni.