PMEGP hnuaia EDP training hawng

Adviser to chief minister TBC Lalvenchhunga, MLA chuan nimin khan Multi-Disciplinary Training Centre (MDTC), Zemabawkah Prime Minister's Employment Generation Programme (PMEGP) hnuaia Entrepreneurship Development Programme (EDP) a hawng a, MDTC hmunhma leh training kalpui mek a en nghal.

TBC Lalvenchhunga chuan, PMEGP chu sorkar laipui leh state sorkar ten an ngaihven thu sawiin, "He scheme hi sorkar flagship programme Bana Kaih nen finkhawm (converge) a ni. PMEGP beneficiary-te'n entrepreneur an ni tih an inhriat chian a ngai," a ti.

Sumdawng hlawhtling ni turin dan leh hrai, thil vawn fel leh chhiah chungchangah te inzir peih a ngaih thu sawiin Lalvenchhunga chuan, kal khawmte chu marketing lamah ṭang lehzual tur leh margin money an hmuh turte a nihna tur taka hmang turin a chah.

EDP training-ah hian subject chi 22-ah resource person-te'n PMEGP hnuaia loan hmu turte thil pawimawh hrang hrang an zirtir dawn a; training hawnnaah hian Mizoram KVI Board chairman C Lalremliana pawhin thu a sawi a, MKVIB chief executive officer Hnamlunchhunga'n KVIB hmalakna leh training chanchin tlangpui a sawi a ni.