Document lem siamte lakah FIR thehluh zel a ni dawn

Lawngtlai district bawrhsap Donny Lalruatsanga hriattirna chhuahin, dan loa document hrang hrang siam an awm tih hriat a nih thu leh, dan loa thil tite lakah hian FIR thehluh zel a nih dawn thu a tarlang.

Bawrhsap chuan, Lawngtlai district-ah birth certificate, tribal certificate, pernament residential certificate, leh document dang lem (fake) siama sumdawnna atan hmang an awm tih hriat a nih thu a tarlang a, "Mipuite'n document dik lo hmanga zirnaah emaw, scheme leh sorkar hnuaia hamṭhatna hrang hrangte dawn tum nan hman tumte kan awm a nih chuan hmang lo turin kan in ngen a ni," a ti.

Lawngtlai DC chuan, document lem hman leh siam phal a ni lo tih Lawngtlai district mipui a hriattir a, "Document siamtute lakah leh document lem kawltute lakah FIR thehluh zel a ni ang," a ti. Thil dik lo laka fihlim turin district mipui a ngen bawk.