Police leh AR-in hmun thumah heroin an man

Mizoram Police leh an thawhpuite chuan tun hnai ni hnih chhung khan Mizoramah heroin eng emaw zat an man.

Bawngkawn Police leh Assam Rifles ṭang dun chuan nimin zing khan F Lalnunmawia (42), Bilkhawthlir nia inchhal khalh TATA truck MZ-01 G-4388 aṭangin heroin gram 57.280 an man a, F Lalnunmawia bakah truck-a chuang ve a nupui Lalthuammawii (44) te manin thubuai an siamsak. Ruihhlo phurtute hian heroin chu Champhai aṭanga an phurh, Avani nia insawi, Kolasib-a mi pek tur a nih thu an sawi.

August 3, 2026 zing dar 7 vel khan Zokhawthar Police chuan Zokhawthar aṭanga Champhai pan Suzuki Burgman scooter MZ-01 AB-0836 aṭangin heroin gram 24 an man a, a neitua puh Hmangaihzuali (50), Ropaiabawk, Chawlhhmun, Aizawl nia inchhál an man nghal.

Zokhawthar police-te hian August 3 zing vêk khan Zokhawthara maxicab counter an dap a; Zokhawthar leh Champhai inkar tlân maxicab aṭangin heroin gram 126 an man. An chhui zuinaah heroin neitua puh Lalthankhuma (53), Zokhawthar pawh an man zui a ni.