KHAWTHLIR

DC-in inverter hlan

Aizawl bawrhsap Lalhriatpuia chuan nimin khan Darlawn Joint YMA hnenah ruihhlo donaa hman tur solar inverter a hlan. Lalhriatpuia chuan, Darlawn Joint YMA-in nasa taka ruihhlo an do chu fakawm a tih thu sawiin, ruihhlo doa an duty-naa hman tur inverter an dil chu ruihhlo donaa an hmalak tawhna leh an hmachhawpte ngaihtuahin pek phu thu a sawi.

Lirthei chetsualna tihtlem dan tur rêl

Lawngtlai District Road Safety Committee chu an chairman Donny Lalruatsanga kaihhruaiin nimin khan an ṭhukhawm a, Lawngtlai district-ah lirtheia chetsualna a tam lo tih tarlan a ni. Kum khat chhunga lirtheia chetsualna thleng ṭhin chu 10%-a tihniam tura hmalak an rêl a; accident thlen theih hlauhthawnawmna hmunte tihchian ni se, BDO-te'n an huam chhungah ṭheuh hma lo la se, an ti.

Red Ribbon Quiz

Siaha District AIDS Prevention and Control Committee chuan nimin khan district level Red Ribbon School Quiz Competition an buatsaih a, bawrhsap VL Hruaizela Khiangte-in a hmanpui. Intihsiakah hian sikul 10 an tel a, Ryusa Elementary School pakhatna an ni. Pakhatna te hi state level intihsiakah Siaha district aiawhin an tel ang.

Pangpar khawi

Kolasib Krishi Vigyan Kendra chuan nimin khan Kolasib Florist Association member-te tan pangpar enkawl leh khawi dan zirna an buatsaih. KVK senior scientist & head Dr Michelle C Lallawmkimi'n a kaihruai a; natna laka pangpar ven dan leh natna neite enkawl dan te, leiṭha siam dan leh pek dan te, smart flower farming kalhmang an inzirtir bakah, a taka tihchhin a ni.

MHIP-in pawi an ti

MHIP Gen. Hqrs chuan thuchhuah siamin, H Ramdinpuii (15), Mualṭhuam North nimina thia hmuh a ni chu pawi an tih thu an tarlang. A thih chhan chhui chhuah vat ni se an duh thu sawiin, "Pawi khawih an awm a nih chuan a phû tâwka hrem ngei a nih theih nan hma kan la zel ang," an ti a; H Ramdinpuii chhungte an tawrhpui thu an tarlang.