Minister-in DoNER hotute a kâwm

Minister of state Lalnghinglova Hmar chuan nimin khan New Delhi-ah Ministry of Development of North Eastern Region (DoNER) hotute a kâwm a; DoNER hnuaia Mizorama project awmte chak zawka kalpui dan tur te, hmasawnna kal mek leh hmachhawpte a sawipui.

Lalnghinglova Hmar hian DoNER secretary Katikithala Srinivas chu a pisaah kâwmin, NESIDS-OTRI hnuaiah Mizoram combat sport zawng zawng hman theih tur Centre of Excellence project sanction a ni chu lawmawm a tih thu a hrilh. Sports leh Tourism department-a hmachhawpte tarlangin, “Mizoram hi India ram Thlasik Khawpui ni thei turin hma kan la ṭan tawh a, December thlaah Winter Festival lian tham buatsaih kan tum. Kan theihnain a tlin piah lamah DoNER puihna kan mamawh dawn,” a ti.

DoNER Secretary chuan, a theihna apiangah Mizoram pui turin DoNER an inpeih thu sawiin, "Mizoram hi ziak leh chhiar tamna, sik leh sa nuam leh hmun mawi a ni a, zirna in ṭha din leh a awm sate tichangtlungin, education hub ni turin theihna a nei," a ti a; state pawn lam zirlaite’n Mizoram an pan khawm chuan khawtual mite'n eizawnna an hlâwkpui dawn thu leh, state economy a tihṭhat tur thu a sawi.

Tourism Minister hian DoNER-a tourism project buaipuitu joint secretary Dr Vipul Aggarwal leh statistical advisor Dharmvir Jha te pawh kâwmin, Mizoramin project a thehluhte dinhmun leh state sorkar hmalakna turte a sawipui a; Mizorama football hmasawnna tur project thehluh tawh a sawipui bawk.

Sports minister Lalnghinglova hian NESIDS-OTRI scheme hnuaia ‘Boxing Centre of Excellence’ sak turah scheme enkawltu DoNER deputy secretary Silabhadra Das kâwmin, chak zawka hmalak dan tur a sawipui. Centre of Excellence hi cheng vbc 38.4 sênga sak tur niin, May 19, 2026 sanction hmuh a ni a, tender chhuah tura buaipui mek a ni.