Lawngtlaia lei chê chungchang sawiho

Nimin khan Lawngtlai DC Donny Lalruatsanga hoin a pisaah sorkar hotu te, khawtlang hruaitute leh MJA aiawhte'n Lawngtlai-III leh Electric Veng lei tlahniam dinhmun leh hmalak dan tur an rêl.

Ṭhutkhawmah hian, lei tlahniam hi kum 1995-a inṭan tawh niin, kum tin a chê a, tun dinhmunah in 30 leh chhungkaw 50 a nghawng tih tarlan a ni.

Khawtlang hruaitute chuan, lei tlahniam vanga harsatna an tawhte leh siamṭhatna tura hmachhawp an neihte an sawi a;lei tlahniam huam chin a zauh avangin SASCI aṭanga hna thawh tur chu a tâwk zo dawn loah ngaiin, DPR mumal tak siamin Mizoram sorkarah thehluh leh ni se, an ti.

Lawngtlai Bawrhsap chuan, lei tlahniam vanga in ṭhiah ngaite chu sorkarin a hre reng tih sawiin, "Chak taka hmalak reng a ni a, kumin fûr lai hian uluk zawka vil leh endik ṭhin a pawimawh. Lei tlahniam hian a huam zau a, Geology & Mining leh Mizoram University aṭangin zirchianna neih tawh a ni," a ti a; SASCI kaltlangin check dam leh tui luankawr ṭha tak siam tum a nih thu a sawi.