Adhoc H/S zirtirtute'n tiam chin awm loin mass casual leave an la ṭan

Mizoram Government Adhoc Aided High School Teachers’ Association (MIGAHTA) chuan an thil phûtte tihlawhtling tura sorkar nawr nan nimin aṭang khan a huhoa chawlh an la ṭan. Mass casual leave an lak hi tiam chin awm lo a ni.

MIGAHTA chuan thuchhuah siamin, kum 2023-ah provincialise an nih tawh avangin provincialise lêt leh turin sorkar an phût a, Lumpsum grant-in-aid (Category S1) hnuaia sorkarin August 4, 2026 aṭanga a dah chu an duh loh thu an tarlang a, "The Mizoram Education (Lumpsum Grant-in-Aid for General Maintenance of Private School) Rules 2026 hi sikul dinhmun dah hniamna tur a a nih avangin kan pawm thei ngai dawn lo," an ti.

Khawtlang sikulte'n hma an sawn theih nan an thâ leh zung leh an thiamna te an hman tawh thu sawiin MIGAHTA chuan, "Dinhmun hniam zawka dah hi ṭha kan ti lo. Sikul dinhmun humhim nan leh zirlai leh ṭhangthar hna zawngte tana pawi thei a nih avangin hlawh tam zawk sorkarin pek min tiam pawh kan hnar a ṭul ta a ni," an ti. Mizoram hmun hrang hrangah nimin khan adhoc H/S managing committee, VC, NGO leh zirlai pawl ten joint meeting an neih thu an tarlang.

MIGAHTA TARLANTE
▶ Khawtlang enkawl sikul 100 chu lumpsum grant-in-aid category A, B leh C-ah te dah a ni.
▶ Adhoc aided school 51 provincialise a ni.
▶ Lumpsum school 57-te chu lumpsum (Category S2)-ah dah an ni.
▶ Keini adhoc school tia hriatte chu tuna kan dinhmun aia hniam lumpsum (Category S1)-ah dah kan ni a, thawktute hlawh tam zawk pek min tiam.