Remna hi tuak chhuah chi a ni - HM

Young Mens Christian Association (YMCA), Aizawl bultumin nimin khan RIPANS-ah World Peace Day hman a ni a; khuallian Home minister K Sapdanga chuan, remna chu tuak chhuah chi a nih thu a sawi.

Home Minister chuan, remna chu amaha piang a ni lo a, a thawha thawh chhuah chi a nih thu sawiin, "A lo awm hnuah pawh mar páta duat taka vawn him chi a ni a, vawiina mite'n naktuka mite hnena hlan chhawn zel tur a ni. Remna hi chhungkua aṭangin a inṭan a, sikul leh kohhran aṭangin a lo piang a, keimahni zing aṭang hian a lo inṭan ṭhin," a ti.

Ṭawngkam hmanin remna a hring ṭhin tih sawiin K Sapdanga chuan, "Mizo upa chuan, 'Ṭawngkam ṭhain sial a man' an tih hi World Peace Day lungphûm pawimawh takah a tel ngei ang," a ti a; Peace Day chu hun biin a her chhuahah ngai lo a, a huhoa mawhphurhna, thawh chhuah tur a nih hriat chhuah thar lehna atana hmang turin kal khawmte a sáwm.

K Sapdanga chuan, remna chu tihpalh thila neih a awm ngai lo tih sawiin, "A tuaka tuak chhuah chi a ni. Rambuai kan nih titawp tura a man kan pek tamzia kha theihnghilh loh tur a ni a, kan tu kan fate hnenah nghet taka rochun turin uar takin i hrilh zel ang u. Tunlaiah hisâp aia chakin thiamna, hriatna leh hmanraw changkangin min chîm a, hmasawnna hian min nawr lo a, min tlansan zawk a ni. Sualna kalphung technology sang ta lutuk hi hmet mit tur chuan sual dona atan kan technology kan tihpun ve zel a ngai," a ti.

K Sapdanga chuan, nun khawharnain ṭhalai tam tak a sual mek tih sawiin, "Tam takin an thih phah mek a, a hluar telh telh dawn niin a lang a, muanna hmelma lian pawl tak a ni ta. Nun khawhar tibo tur chuan rem hriatna tihpun hle a ngai," a ti a; khaptu ai chuan kawhhmuhtu nih chu damna kawng dik a nih thu a sawi.

Home Minister chuan, inrêlbâwlna (management) chu subject harsa ber pawla sawi a nih thu sawiin, "Inpekna leh taimakna ṭangkawpin neih chi niin ka ring. Hrilhhriat chawp changkanna hi chu leadership quality a tling lo a, mahnia zir chhuah a ngai zel a ni," a ti.

YMCA chu mihringte kaihruai a, nuam ti taka khawsa tura chhertu a nih thu sawiin, remna lei dawh chu an mawhphurhna a ni tih hria a, rawngbawlna an koa innghat a ni tih hre thar turin a chah.

World Peace Day hmannaah hian YMCA, Aizawl president Dr R Lalthang-liana, MLA pawhin thu a sawi a, remna chungchangah thutiam sawi rual a ni.