World Indigenous Day pualin Aizawlah Zo thuam nen kawng zawh a ni dawn

Zo Reunification Organization (ZORO) chuan August 8, 2026 (Inrinni) hian World Indigenous Day pualin Aizawlah Zo thuam inbelin kawng an zawh dawn a, tel turin mi tin an sáwm.

Nimin khan ZORO hruaitute'n Aizawl Press Club-ah thuthar thehdarhtute an kâwm a; an vice president L Ramdinliana Renthlei chuan, World Indigenous Day chu tualṭo hnamte ni a nih thu sawiin, "Kum tin kan hmang ṭhin. Kuminah pawh hman kan tum a, Zo thuama inthuamin Millennium Centre aṭanga Vanapa Hall thleng kawng zawh a ni dawn," a ti.

L Ramdinliana Renthlei chuan, World Indigenous Day hmang turin Zo fa zawng zawng an sáwm tih sawiin, "He hun hmang turte chuan mahni hnam thuam inbel tur a ni. Indigenous Day hi hnam tlem zawkte chanvo humhalh a, an thawnthu leh nunphung vawng nung tura hriat chhuah nan leh chawimawi nan hman ṭhin a ni," a ti a; Indigenous Day chu Mizote tan a pawimawh thu a sawi.

World Indigenous Day chu khawvela tualṭo hnamte dinhmun chawi kân leh an dikna chanvo humhalh a, an zalenna leh inrelbawlna zahsak nan hman ṭhin a nih thu sawiin L Ramdinliana chuan, "Keini tualṭo hnam, Zo fate tan UNO-in declaration min siamsak a, kan duhthlan theihna leh kan nihna te declaration-a min puan chhuahsakna ní a nih avangin kan hlut tur a ni," a ti.

World Indigenous Day puala kawngzawh hi Millennium Centre aṭanga Vanapa Hall thleng neih tur niin, chawhma dar 11-ah ṭan tura ruahman a ni a; chawhnu dar 1-ah Art & Culture minister C Lalsawivunga hoin Vanapa Hall-ah hun hman zui a ni ang.