KHAWTHLIR

Thisen pe

J Thankima College NSS chuan nimin khan Civil Hospital, Aizawl tan thisen unit 87 an pe a, petute mipa 65 leh hmeichhia 22 an ni a; Serchhip Higher Secondary School NSS pawhin nimin khan District Hospital tan thisen unit 28 an pe a, petute mipa 23 leh hmeichhia panga an ni. Ebenezar Medical Center chuan an din champha pualin nimin khan thisen Civil Hospital Aizawl tan unit 20 an pe a; August 3 aṭang khan pe ṭanin, nimin thleng khan unit 72 an pe tawh a, vawiinah pek leh an tum bawk.

Pawndum nen CM hmuah tum

MNF ṭhalaite chuan Mizoram pawna zin chief minister Lalduhoma chu ILP sawi derthâwng leh mipui tithlabâr zawnga thu sawia an ngaih avangin Aizawla a rawn haw hunah pawndum nen lo hmuah an tum thu an tarlang a; CM chu a thusawi sût tur leh thupha chawi turin an phût. School provincialise phûta MIGAHTA hmalakna chu àwm an ti a, an thlàwp thu leh, MPSC chungchanga MZP hmalakna an thlàwp thu an tarlang bawk.

Zirhona buatsaih

Chief Electoral Officer pisa chuan nimin khan Hotel Regency-ah 'Democracy for Peaceful Coexistence' tih thupui zirhona an buatsaih a, CEO Garima Gupta-i'n a hmanpui. Mithiamte'n thupui hrang hrang an sawi a, zawhna leh chhanna hun hman a ni.

Red Ribbon Quiz

Mizoram State AIDS Control Society, District AIDS Prevention & Control Committee, School Education department leh Samagra Shiksha te chuan nimin khan Lunglei leh Kolasib-ah district level Red Ribbon Quiz Competition an buatsaih. Lunglei district-ah hian sikul pariat an inel a, Loroto Play School pakhatna an ni. Kolasib-ah hian sikul 17 an tel a, Saidan Secondary School pakhatna an ni. District tina pakhatnate state level inelna an hmachhawn leh dawn a ni.