Mualṭhuam tleirawl thihna chungchangah belhchian dâwl lo tidarh lo turin mipui ngen

Mizoram Police chuan thu­chhuah siamin, H Ramdinpuii (15), Mual­ṭhuam North tual­thihna chu ngawrh taka chhui mek a nih thu an tarlang a; he tual­thihna chung­changah hian thu belh­chian dâwl lo thehdarh lo tur leh hnu­chhuina tibuai zawnga khawsa lo turin mi tin an ngen.

H Ramdinpuii thihnaah hian Lunglei Police Station-ah August 5, 2026 khan BNS Section 103(1) tlawhchhanin tualthah thubuai leh BNS 140(1) mi rûk bo thubuai ziah luh a nih thu Mizoram Police chuan an tarlang a, "Thil thleng hian Police beng a thlen veleh rang takin SDPO leh a team bakah, Forensic lam a hmunah kal nghalin, inquest leh a hmuna tih tur ṭulte tih nghal a ni," an ti.

Mizoram Police tarlan danin, H Ramdinpuii thihna chungchangah Lunglei PS-a thubuai ziah luh a nih hnuah a chhui turin Special Investigation Team (SIT) din a ni a; team leader atan Lunglei SDPO R Lalthankima ruat niin, member-ah sub-inspector ZD Lalremruata leh ASI David Rodingpuia an awm.

SIT member-te chu Mualṭhuam North khuaah an inkhuar nghal thu sawiin Mizoram Police chuan, "Ngun tak leh uluk takin an chhui nghal. Tun dinhmunah rinhlelh thua man an la awm rih lo a, theihtawpin he tualthahna runthlak taka pawikhawihtu man chhuah tumin beih mek a ni," an ti.

Mizoram Police chuan, H Ramdinpuii thihna chungchangah thu belhchian dâwl lo thehdarh lo tur leh police-te hnu­chhuina tikhaihlak zawnga khawsa lo turin mipui an ngen a; pawi­khawihtu an man chhuah theih nan police-te thawhpui turin mi tin an sáwm bawk.