Ram dang mi damlo Mizorama enkawlte chungchangah dan siam turin AAP-in sorkar phût

Mizorama Aam Aadmi Party (AAP) hruaitute chuan nimin khan Aizawl Press Club-ah thuthar thehdarhtute an kâwm a; ram dang mi damlo (medical tourist)-te Mizoram chhung damdawi-ina enkawl leh kaihhruai dan tur mumal siam turin Mizoram sorkar an phût tih an sawi.

AAP hruaitute chuan, Mizoramah ram dang aṭangin raltlan leh dan phal loha rawn lut damlo, Mizoram chhung damdawi-ina enkawl (medical tourist)-te lo dawnsawna kaihhruaina dan a awm lo tih an sawina, "Dan nei lo sorkar kan ni mek a ni ber a, a ṭha lo hle. Dan nei lo ang mai kan ni hi ZPM kaihhruai sorkar kan dem a, dan kengkawh turin kan phût a ni," an ti.

Passport (Entry into India) Act, 1920-in India khua leh tui ni lo, India rama rawn lutte tan passport leh VISA dik leh nung a phût tih sawiin AAP hruaitute chuan, "Foreigners Act, 1946 chuan foreigner dan bawhchhiate hremna dan te, India khua leh tui ni lo rawn lutte India rama an chàm chhunga an awm dan tur leh a kaihhnawih, an rama an haw dan turte a duang. Mahse, heng dante hi hman a nih loh avangin foreigner-te an duh ang angin an khawsa mek a ni," an ti a; ram mipuite'n harsatna an tawh phah tih an sawi.

AAP hruaitute chuan, "Dam lohna vanga rawn lut (medical tourist)-te'n sorkar leh mimal damdawi-inah dan leh thupek awm miah loa enkawlna an dawngte hi dan fel tak hnuaiah ni se, record fel vek ni se, sorkar damdawi-ina enkawlte phei chu fee felfai takin pe se. A nih loh chuan India mipui sum (public money), ram neitute chan ai an ei hêk nasa hle thei a ni," an ti.