KHAWTHLIR

Thisen pe

Ebenezer Medical Center chuan an din champha vawi 8-na pualin nimin khan Civil Hospital, Aizawl blood bank-ah unit 24 an pe. Ebenezer Hospital hian an din champha pual hian August 3 aṭang khan an pe ṭan a, ni li chhungin thisen unit 96 an pe a ni.

Ambulance-ah meth man a ni

Assam Rifles leh Directorate of Revenue Intelligence chuan August 6, Ningani khan Seling ram chhunga Sakei Bangla Restaurant bulah Suzuki Eeco ambulance aṭangin methamphetamine kg 15 an man a, ambulance chhunga chuang mi pathum man tel nghal an ni. Mi man zingah hian ambulance-a damlo anga awm hmeichhe pakhat a tel.

ZPM Ṭhalaite'n tualthihna pawi ti

ZPM Ṭhalai chuan thuchhuah siamin, mi kut tuara thi nia hriat H Ramdinpuii (15), Mualṭhuam North thihna chu pawi an tih tak zet thu leh, a chhungte an tawrhpui thu an tarlang. Ramdinpuii'n a dikna chanvo a hmuh ngei theih nan atan an din tlat dawn thu sawiin, "Pawikhawihtute man chhuah an nih a, hrem ngei an nih theih nan Ramdinpuii tan ZPM ṭhalaite kan ding tlat dawn a ni," an ti.

Family Pension

Khawzawl leh Hnahthiala District Treasury Office-te chuan nimin khan an huam chhung ve vea MJA, VC, tlawmngai pawl, kohhran leh pensioner pawl hruaitute leh sorkar hnathawkte pualin Family Pension sorkara pek let chungchanga hriat tur pawimawh inhrilhfiahna an buatsaih. Hun tiam chhunga PPO pe kirte chu an pension lak tawh zawng zawng sorkarin a ngaihdam dawn thu leh, hun tiam pelh hnua mite chu dan hnuaiah thubuai siamsak an nih dawn thu tarlan a ni.

SWM Rules sawiho

Lunglei District Water & Sanitation Mission chu nimin khan EO Lalhruaitluangi kaihhruaiin an ṭhukhawm. Bawlhhlawh sawngbawlna dan thar, Solid Waste Management (SWM) Rules, 2026-in bawlhhlawh thliar dan a siam chu October 31, 2026 hmaa Lunglei district-a khua zawng zawng zingah 30%-ah tal kalpui tura hmalak a ni dawn thu tarlan a ni.