National Handloom Day hman a ni

Nimin kha National Handloom Day a ni a, Millennium Centre, Aizawl chung zawlah leh Thenzawlah hman niin, Handloom Exhibition buatsaih ve ve a ni.

National Handloom Day hi Aizawlah chuan NABARD, Mizoram Regional Office bultumin hman a ni a; Thenzawl Auditorium-ah pawh Mizoram Handloom & Handicrafts Development Corporation Ltd (ZOHANDCO) huaihawta hman niin, minister of state B Lalchhanzova'n a hmanpui.

B Lalchhanzova chuan, kum 1980 chho aṭangin Thenzawl mi eng emaw zatin eizawnna atan puantah an hman thu sawiin, "Puantah hlutna tlahniam zel chu kum 2009-ah NABARD puihnain Cod Nerc leh puantah association ten an tharthawh leh a ni," a ti a; puantaha eizawnna ngai hlu a, a ṭhan zel theih nan hma la zel turin khawtlang hruaitute a chah bakah, hmeichhe hna chauha ngai loa tah ve mipate a sáwm.

Minister chuan, Mizoram chauh ni lo, ram dangah pawh tam zawka puan hralh a nih theih nan design-ah ṭan la thar tur te, ṭha lehzual tah tur te, mahni duh zawng ngawt ni loin, a leitute duh zawng leh hnam dangte lawm zawng turte ngaihtuah turin puan tahtute a fuih a; ZOHANDCO nen ṭang tlanga hma la thar zel turin a chah bawk.

ZOHANDCO managing director LP Lalchangkima chuan, kum 2019 khan Mizoramah puantahtu 30,000 vel an awm a, tunah chuan 40,000 chuang an awm tawh thu a sawi a; Safdarjung, New Delhi-ah Mizo thil siam bik zawrhna dawr thar Chief Minister-in a hawn dawn thu leh, Kolkata leh Bangalore-ah pawh hmalak mek a nih thu sawiin, "Hnam ro thil hlute a neitu nih chhinchhiahna GI Tag leh patent buaipui mek a ni," a ti.

Handloom Day pual hian Handloom Exhibition buatsaih a ni a; chawhnuah traditional handloom, trademark, patent leh Geographical Indication chungchang zirho a ni.

August 7, 1905-a mahni ram thil siam ngai hlu tura hmalakna Swadeshi Movement din ṭan ní hriatreng nan Ministry of Textiles chuan kum 2015 khan August 7 chu National Handloom Day atan a puang a ni.