Adhoc grant-in-aid high school-a zirtirtute'n chawlh an la chhunzawm

Mizoram Government Adhoc Aided High School Teachers’ Association (MIGAHTA) chuan an sikulte sorkara dah (provincialise) phûtin nimin khan mass casual leave an la chhunzawm a; Mizoramah ‘The Mizoram Education (Lumpsum Grants-in-Aid for General Maintenance of Private School) Rules, 2026’ duh lohna a lian zel niin an tarlang.

MIGAHTA chuan thuchhuah siamin, tun hnaiah sorkarin category hrang hranga sikul 208 chu dinhmun sang zawkah dahin, thawktute hlawh leh sikulin a dawn tur pawisa pawh a tipung tih an tarlang a, "Keini adhoc grant-in-aid school-te chu tuna kan dinhmun aia hniam lumpsum grant-in-aid (Category S1)-ah dah kan ni a, thawktute hlawh ṭha zawk pek min tiam. Hlawh sang zawk min tiam hi lawmawm kan tih rualin, sikul dinhmun a tlakhniam dawn ai chuan tiin hlawh pung tur kan hnar a ni," an ti.

Sorkarin lumpsum GIA (Category S1) hnuaiah adhoc GIA sikula thawk laite an chawlh/thih chuan an aiawhtu tur chu hlawh hniam taka lak an ni dawn nia sawiin MIGAHTA chuan, "A tuar tur ber chu khawpuia zirna ṭha zawk pan ve thei lo thingtlang zirlaite an ni," an ti a; Mizoramah The Mizoram Education (Lumpsum Grants-in-Aid for General Maintenance of Private School) Rules, 2026 duh lohna a lian zel niin an sawi.

Mizoram sorkarin a ruahman dan chuan, The Mizoram Education (Lumpsum Grants-in-Aid for General Maintenance of Private School) Rules, 2026-ah Special Category 1 (Category S1)-a awmte hnenah grant-in-aid pek a ni dawn a; kum khatah HSS tan Rs 88,50,000, high school tan Rs 38,00,000 leh middle school tan Rs 30,00,000 pek tur a ni.

Category S1-a awmte'n sorkar aṭanga sum an dawn chu 60% aia tlem lo leh 90% aia tam lo chu sikula thawkte hlawh atan hman tur a ni a; a bak zawng chu danin a phal chinah sikul enkawlna dang atan hman theih a ni.

Category S1 hnuaia thawk mekte hian zirtirtu nghet ang chiahin hlawh (full basic pay + full allowance) an la dawn a; death-cum-retirement-gratuity atan Rs 4,00,000 pek tur an ni bawk.