Anti-Littering Campaign buatsaih

Mizoram Pollution Control Board (MPCB) hnuaia EIACP Hub chuan zin veivâkte’n lirthei aṭanga bawlhhlawh an paih chhuah lohna tura mipui zirtir nan nimin khan ‘Anti-Littering Campaign’ an buatsaih.

Anti-Littering Campaign hi Aizawl aṭanga Lunglei panna kawng, Aizawl daia Ṭawngtaina Hmunah buatsaih a ni a; zin veivâkte hnenah lirthei aṭanga bawlhhlawh paih lo tura ngenna thuziak (pamphlet) an sem bakah, maxicab eng emaw zat hnenah lirthei chhunga dah tur bawlhhlawh báwm tê (car dustbin) an sem bawk.

EIACP Hub hian environment humhalh leh humhim kawngah nasa takin hma an la ṭhin a, kumina World Environment Day leh International Plastic Bag Free Day pualin mipuite hnenah sarâng aia hman turin a thlâwnin cloth bag (puan ip) ṭhahnem tak an lo sem chhuak a ni.

Environment tana him leh ṭha lo, sarâng leh plastic lam chi hmang tlêm a, hnualsuat zel turin EIACP Hub, MPCB chuan Mizoram mipui an ngen bawk.