Hnathawhnaa rûi an awm avangin DC-in rûih theih thil ti lo turin hriattir

Saitual district bawrhsap Srinivas Sadi chuan thupek chhuahin, Saitual district-a sorkar hnathawkte chu hna thawh hun chhungin ruih theih thil rêng rêng ti lo turin a hriattir.

Srinivas Sadi chuan, tunlai hian Saitual district-a sorkar hnathawk zingah hna thawh hun chhung (office hour)-a ruih chíng an awm tih hriat a nih thu a tarlang a, "Central Civil Services (Conduct) Rules, 1964 Rule 22(b) chuan sorkar hnathawkte chu an hnathawh hun chhungin ruih theih thil an ti tur a ni lo a, ruih theih thil eng chi pawhin an hnathawh a tihbuai loh nan an invawng tur a ni, tih a ni," a ti.

Saitual district-a sorkar hnathawkte chu hna an thawh hun chhungin ruih theih thil rêng rêng tih phal a ni lo tih sawiin Bawrhsap chuan, khauh taka thupek kenkawh a nih theih nan sorkar office-te chu hrilh lâwk loa endik ṭhin a nih dawn thu a tarlang.

Saitual DC tarlan danin, thupek bawhchhiate chu an thil tihsual azirin CCS (Classification, Control and Appeal) Rules, 1965 Rule 11 behchhanin an hlawh punna (increment) hrènsak te, an kaisanna tihkhawmuan te, loh theih loha pension-tir te, bàn leh, thil danga hrem theih an ni.